बुटवल । रुपन्देहीको बुटवल उपमहानगरपालिका–११ होराइजन चोकमा एक महिलासहित उनका दुई छोरीको गएराति विभत्स हत्या भएको छ ।
प्रहरीले प्रारम्भिक अनुसन्धानमा घटना हत्या अभियुक्त र मृतकबीचको पुरानो सम्बन्धसँग जोडिएको पाइएको जनाएको छ ।
हत्यामा संलग्न व्यक्ति सुजन कोइराला ३४ वर्षीय दीपा बस्यालका पूर्वपति हुन्। पाल्पाको प्रभाव–११ घर भएका कोइराला र दीपाबीच एक दशकअगाडि सम्बन्ध विच्छेद भएको थियो ।
डिभोर्सपछि दीपाले नवलपरासीका शंकर ढकालसँग दोस्रो विवाह गरेकी थिइन्। ढकालबाट ७ वर्षीया स्नेहा र ४ वर्षीया हिमानी नामकी दुई छोरी थिए । ढकालसहित दुई छोरीको शव हत्या भएको अवस्थामा बुधबार बिहान फेला परेको थियो ।
घटनामा मारिएका दुई बालिकाहरू दीपका हालका पति ढकालतर्फका सन्तान हुन् । दीपाको पहिलो पति सुजन कोइरालाबाट भने कुनै सन्तान थिएनन् । प्रहरीका अनुसार सुजन कोइरालाले २०६९ सालमा आफ्नै दाजुको हत्या गरी जेल परेका थिए । कास्की कारागारमा सजाय काटिरहेका उनी २०७८ असोज ३ गते संविधान दिवसको अवसरमा आममाफी पाई छुटेका थिए ।
प्रहरीका अनुसार छुटेपछि कोइराला बुटवलको होराइजन चोकस्थित आफ्नै घरमा बस्दै आएका थिए। दीपाको हालको श्रीमान् शंकर ढकाल रोजगारीका लागि दुबईमा छन् । यसबीचमा दीपा बेला–बेला सुजनको घर जाने गरेको स्थानीयहरूले बताएका छन् ।
हत्या आवेशमा, योजनाबद्ध होइन
इलाका प्रहरी कार्यालय बुटवलका डिएसपी इन्द्र बहादुर रानाका हत्या योजनाबद्ध नभइ माया–प्रेमका विषयमा विवाद हुँदा आवेशमा आएर भएको देखिन्छ । उनका अनुसार, दीपा र कोइरालाबीच पछिल्लो समय निरन्तर भेटघाट हुने क्रम चलेको थियो ।
घटनाको दिन दीपा दुई छोरीसहित सुजनको घर गएकी थिइन्। राति नै हत्या गरिएको प्रहरीले जनाएको छ। कोइरालाले दीपालाई घरेलु हतियार प्रहार गरेर र छोरीहरूलाई घाँटी थिचेर हत्या गरेको प्रहरीको भनाइ छ ।
दीपा र कोइरालाको पृष्ठभूमि
मृतक दीपा पाल्पाको तानसेन नगरपालिका–७ स्थित कुनसरे आधारभूत स्वास्थ्य केन्द्रमा कार्यरत स्वास्थ्यकर्मी थिइन् । सुजन कोइराला भने बुटवलमै घरमा एक्लै बस्थे र हस्तकलाका साना व्यापार गर्दै आएका थिए ।
स्थानीयहरूका अनुसार कोइरालाको आमा पनि बुटवलमै बस्छिन्। उनी विगतमा दाजु हत्या प्रकरणमा जेल परेका र त्यसबेला पनि उच्च तहका नेताहरू तथा पाल्पा–कास्कीका प्रभावशाली व्यक्तिहरूसँग सम्पर्क गरी छुटेका थिए भन्ने आरोप पनि स्थानीयले लगाएका छन् ।
पक्राउ र अनुसन्धान
हत्या आरोपमा सुजन कोइराला प्रहरी नियन्त्रणमा छन्। अहिले इलाका प्रहरी कार्यालय बुटवलले घटनाको विस्तृत अनुसन्धान थालेको जनाएको छ । शवलाई पोस्टमार्टमका लागि लुम्बिनी प्रादेशिक अस्पतालमा राखिएको छ ।
प्रहरीका अनुसार कोइरालाले सोधपुछका क्रममा पटक–पटक हत्या आफूले आवेशमा गरेको बताएका छन्।
जन मेडिया
थप सामाग्री
अख्तियार प्रमुखविरुद्ध नै अख्तियारमा उजुरी दर्ता
गण्डकीमा ३५ हजार गर्भवती हुँदा आधाभन्दा कमले जन्माउँछन् बच्चा
सिंहदरबारभित्रबाटै हरायो श्रम मन्त्रालयको गाडी