संविधान र लोकतन्त्रको रक्षाका लागि दुई बुँदे गर्नुपरेको प्रचण्डको तर्क

उनले शेरा दरबार र अस्थायी शिविर प्रकरणमा मुछ्ने कुनै आधार नभेटेपछि ‘प्रतिकृयावादीहरु’ले माओवादीको बद्नाम गर्न दुई बुँदेको सहारा लिएको बताए । आफ्नै दलभित्रै पनि विषय नबुझेर चित्त दुखाइ सुरु भएको उनको भनाइ थियो ।

उनले संविधान र लोकतन्त्रको रक्षाका लागि दुई बुँदे गर्नुपरेको तर्क गरे । भिजिट भिषा प्रकरणमा गृहमन्त्रीको राजीनामा र छानबिन समितिको माग गर्दै माओवादी लगायतका प्रतिपक्ष दलहरुले लगातार संसद् अवरुद्ध गरेका थिए । माओवादीले दुई बुँदे सहमति गर्दै संसद् खोल्न तयार भए पनि रास्वपा लगातार जसो विरोधमा रहँदै आएको छ ।

प्रचण्डले भने, ‘संघीय निजामति ऐन र शिक्षा ऐनजस्ता महत्त्वपूर्ण ऐन आउँदैछन् । यस्तो अवस्थामा एक महिनाको समय दिएर संसद् खोल्न किन नहुने । बजेटका लागि त एक दिन सवैले खोलेकै हो ।’

उनले संसद् अवरोध होस भन्ने चाहना राख्ने सरकारभित्रै रहेको बताए । ‘दुई बुँदेभित्र छानबिनको कुरा, अध्ययनको कुरा र समिति बनाएर दोषीलाई कारबाही गर्ने कुरामा प्रतिबद्धता भएको छ । एक महिनाभित्र हुने कुरा छ यो । एक महिनाभित्र भएन भने पक्कै पनि यो कुरा छुट्दैन । किन भने अध्यागमन र भिजिट भिसाको समस्या अहिलेको सरकार र अहिलेको गृहमन्त्रीबाट सुरु भएको र यही खत्तम हुने वाला हैन यो । यसको गहिरो अध्ययन, छानबिन र सुधार नगररे छोडेर छोडिने कुरा छैन । अगाडि जान्छ जान्छ’, प्रचण्डले भने ।

आफूले छाडे पनि अब जनताले नछाड्ने अवस्थामा यो विषय पुगेको उनले बताए । ‘यो १५/२० दिनमा दुई तीनवटा ऐन बन्ने जुन कुरा छ त्यो बन्यो भने त्यसमा टेकेर झन् शक्तिशाली रुपमा यो विषयलाई अगाडि लैजाने छौं,’ प्रचण्डको भनाइ थियो । उनले समाचार र सामाजिक सञ्जालमा हुने चर्चा र हल्लाले आफ्नै पार्टीका केही साथीहरुलाई नबुझेर के हो के हो भन्ने लाग्ने गरेको प्रचण्डले बताए ।

‘सबले गाली गरेका छन् । छेपारो भनेका छन् । हो क्या हो लिडरशिपले गल्ती गर्‍यो भन्ने पनि लाग्न सक्छ,’ प्रचण्डले भने । केहीले फेरि जानी, बुझेरै यही हो मौका भन्ने गरेको उनले बताए । ‘बाहिर मिडियाले गाली गरेका छन्, यही बेलामा प्रचण्डलाई ठोक्न पाए कमजोर पार्न सकिन्छ भन्ने धार पनि हुन सक्छ,’ प्रचण्डले भने ।

दुई बुँदे नगरेको भए हुन्थ्यो भन्ने कुरा ‘बच्काना’ भएको र नेपाली राजनीतिलाई र अन्तरविरोध थाहा नपाउनुको परिणाम भएको दाहालले बताए । छानबिनको कुरालाई नछाडि ऐन बनाउने कुराको आवश्यकतालाई बोध गरेर अगाडि बढ्दा, जनताप्रति जिम्मेवार भएर सोच्दा मान्छेहरुलाई किन टाउको दुख्नु पर्‍यो भन्ने प्रचण्डको प्रश्न थियो ।